இலக்கணம் தவறிய கவிதை

ஒரு வழியாக
கவிதை என்று நினைத்து
அவளைப் பற்றி ஒரு கவிதையை எழுதி முடித்தேன்
எதற்கும் இருக்கட்டுமே என்று நண்பனிடம் காட்டினேன்
இது எழுத்துப் பிழை,  இது சந்திப் பிழை, இது.. 
பாவி,
நான்கு வரிகளில் நாற்பது பிழைகளைக் கண்டுபிடித்துவிட்டான்
இலக்கணம் தெரியாத நீயெல்லாம்
ஏன் கவிதை எழுதுகிறாய் என்று கேட்டும் விட்டான்
பரவாயில்லை..
இலக்கணம் தவறியிருந்தாலும் எடுத்துச் சென்று காட்டினேன் அவளிடம்
முழுவதும் படித்துவிட்டு,
ஒரு கோணல் சிரிப்பைப் பதிலாக அளித்தாள்!
எவன் சொன்னான்
கவிதைக்கு இலக்கணம் வேண்டும் என்று.

வீதியில் சந்தித்த ஒரு பார்வை

வீதியில் நடந்து செல்கையில்

தற்செயலாகத்தான் பார்த்தேன் அப்பெண்ணை

தனக்கு வீடில்லை என

ஒரு தட்டியில் எழுதி தெரியப்படுத்துகிறாள்

சத்தியமாக இதற்குப் பின்னே ஒரு கதை இருக்கும்

அதைத் கேட்டுத்

தாங்கும் சக்தி தான் எனக்கில்லை

அவளைக் கடந்து செல்கையில்

குழப்பத்துடனே ஓரக் கண்ணில் பார்க்கிறேன்

கேட்டிருந்தால்

ஒரு கதையோடு போயிருக்கும்

இப்பொழுது பார்வையிலேயே சொல்கிறாள்

ஓராயிரம் அமைதியிழக்கச் செய்யும் கதைகளை